相信各位八、九十後都對日本傳嚟嘅可樂糖唔陌生，呢個懷舊零食係一個仿鐵罐可樂嘅塑膠筒，入面裝住一粒粒可樂碳酸糖。有人鍾意將佢含喺口入面等佢慢慢溶化， 有人鍾意直接咬碎享受酸甜滋味，亦有人會直接一次倒好幾粒入口，令成個口腔都充滿可樂香味！

大家食咗咁耐「orion可樂糖」，你哋又知唔知佢係幾時推出嘅呢？原來「orion可樂糖」於1978年就開始販售，至今已超過40年，真係陪伴住無數人嘅成長歲月！最近生產呢款可樂糖嘅日本廠商「orion」就同「有樂製菓」合作，推出咗期間限定嘅可樂糖冰，消息一出隨即引起日本民眾嘅搶購！

近年好多零食公司同廠商都愛打住「懷舊風」嘅旗號，以懷舊零食嘅包裝同味道，新推出更多新時代美食，之前就有「森永牛奶糖」變成「森永牛奶糖麥旋風」、「KitKat朱古力」變成「KitKat麥旋風」、「白兔糖」更變成護膚產品，大家亦衝著童年回憶而掀起一波搶購潮～

呢股「懷舊風」當然未退，最近港人最愛懷舊小食之一「orion可樂糖」亦變成「可樂糖冰」。唔但只外觀配色完全走復古風可愛包裝，就連味道亦神還原！呢款「可樂糖冰」超適合夏天食，冰涼口感為你徹底降溫，好食又消暑。冰沙入面加入大量碳酸糖，除咗食落有可樂味，內裡更有粒粒可樂糖，大大增加口感層次！有網友發文表示「係童年回憶呀！」、「實在太好食啦！」更比出將近滿分嘅好評，絕對值得一試！

呢款冰沙嘅建議售價為140日圓（不含稅），唔係永久推出嘅，全日本限量19萬個，暫時只可以喺日本西友百貨、九州AEON/MaxValu同關西地區嘅唐吉軻德激安的殿堂先買得到。可惜嘅係，沙冰係無辦法搵代購買嘅，想試嘅朋友可能要自己飛日本，好好把握機會啦！